पुणे : के. जे. अभियांत्रिकी महाविद्यालयातील विद्यार्थ्यांना माहिती तंत्रज्ञान क्षेत्रातील अग्रणी असलेल्या ‘झेन्सार टेक्नॉलॉजी’च्या वतीने विविध पुरस्कारांनी गौरविण्यात आले. सॉफ्टवेअर इंजिनीअर्स म्हणून वेगवेगळ्या प्रकल्पांमध्ये छाप पाडलेल्या विद्यार्थ्यांना दर वर्षी ‘झेन्सार’तर्फे पुरस्कार दिले जातात. यंदा के. जे. अभियांत्रिकी महाविद्यालयाच्या मुस्तफा बादशाह, गुरप्रीत गिल, सानिया डिसूझा या विद्यार्थ्यांना ‘बेस्ट परफॉर्मर ऑफ द टीम’ पुरस्कार देण्यात आला.
अमिद पटेल याला ‘बेस्ट परफॉर्मर ऑफ दी टीम’ आणि ‘बेस्ट परफॉर्मर ऑफ दी इयर’ पुरस्कार देण्यात आला. मोहसीन नदाफ या विद्यार्थ्याला कंपनीतर्फे जोहान्सबर्ग येथे जाण्याची संधी मिळाली. के. जे. महाविद्यालयाचे ८५पेक्षा अधिक विद्यार्थी ‘झेन्सार’बरोबर काम करत आहेत. विद्यार्थ्यांची रोजगारक्षमता वाढविण्यासाठी सॉफ्ट स्किल प्रशिक्षण, ॲप्टिट्यूड चाचणी घेतली जाते. ट्रेनिंग प्लेसमेंट विभाग आणि झेन्सार यांच्यात सामंजस्य करार झाला असून, १०० मुलांचे २०० तासांचे प्रशिक्षण घेतले जाते.
ऑगस्ट महिन्यात प्लेसमेंट होणाऱ्या विद्यार्थ्यांनी सातत्याने चांगले काम करून पुरस्कार मिळवावेत, असे आवाहन प्राचार्य डॉ. सुहास खोत यांनी केले. संस्थेचे अध्यक्ष कल्याण जाधव, खजिनदार विनोद जाधव, व्यवस्थापकीय संचालिका हर्षदा जाधव, कार्यकारी संचालक डॉ. हेमंत अभ्यंकर यांनी विद्यार्थ्यांचे कौतुक केले आहे.